KAMPUNI YA TANGA CEMENT YAZINDUA KINU CHA PILI CHA UZALISHAJI WA KLINKA NCHINI

Na Said Killeo ..TANGA

Kampuni ya saruji ya Tanga Cement jana ilizindua kinu cha pili cha kuzalisha bidhaa ya klinka hatua inayotajwa kuwa itakiwezesha kiwanda hicho kuongeza uzalishaji wa malighafi hiyo muhimu katika utengenezaji wa saruji kutoka tani laki tano kwa mwaka mpaka kufikia tani milioni moja na laki mbili na nusu (1.25mil).

Akizungumza katika katika hafla ya uzinduzi wa kinu hicho, Mwenyekiti wa Bodi wa kampuni hiyo, Wakili Lawrence Masha, alisema Mradi huo ulioanza Agosti 13, 2013 unajumuisha mtambo wa kuponda mawe chokaa na udongo, mtambo wa kuchanganyia mawe chokaa na udongo, mtambo wa kusaga mchanganyiko wa udongo na mawe chokaa, pamoja na  mtambo wa kusaga makaa ya mawe.

Alisema gharama za ujenzi wa mradi huo mpaka kukamilika ni kiasi cha dola za kimarekani milioni 152 huku akiongeza kuwa majaribio ya uzalishaji wa klinka ya kwanza kutoka kinu hicho kipya yalifanyika Disemba 10 mwaka 2015.