UEFA: 8 BORA YAKAMILIKA "ENGLAND HAKUNA TIMU HATA MOJA"

Jana Usiku Barcelona na Juventus zimekamilisha idadi ya Timu 8 zitakazocheza Robo Fainali ya UEFA CHAMPIONZ LIGI Mwezi ujao.

Barcelona, wakiwa wameshinda Mechi ya Kwanza 2-1 huko Etihad, Jana ndani ya Nou Camp waliifunga Man City Bao 1-0 na kuhakikisha kuwa England, kwa mara ya pili katika Misimu mitatu, haina Timu kwenye Robo Fainali ya Mashindano haya na pia kuleta mashaka kwa Meneja Manuel Pellegrini kwenye himaya yake huko City baada kupokea kipigo cha 4 katika Mechi 5 zilizopita huku wakionekana kushindwa kutetea Taji lao England wakiwa Nafasi ya Pili na Pointi 6 nyuma ýa Vinara Chelsea ambao pia wana Mechi 1 mkononi.

City, ambao wanadaiwa kuwa na Timu inayolipwa vizuri zaidi huko Ulaya, sasa haijatinga Robo Fainali ya Mashindano haya katika majaribio yake Manne yaliyopita.

Bao la Barca hiyo Jana lilifungwa na Rakitic katika Dakika ya 31 baada pasi murua ya Lionel Messi.

Katika Mechi nyingine iliyochezwa Jana huko Signal Iduna Park, Wenyeji Borussia Dortmund walipigwa 3-0 na Juventus na kutupwa nje kwa Jumla ya Bao 5-1 baada ya kufungwa Mechi ya kwanza 2-1 huko Turin.

Bao za Juve zilifungwa na Carlos Tevez, Bao 2, na Alvaro Morata.

Barca na Juve zinaungana na Real Madrid, Mabingwa Watetezi, FC Porto, Bayern Munich, PSG, Atletico Madrid na AS Monaco kwenye Robo Fainali ambayo Droo yake itafanyika kesho.