WAKAZI NA WADAU WA MAZINGIRA MKOANI TANGA WATAKA SHERIA MPYA KULINDA CHANZO CHA MAJI MTO ZIGI.!

Mto Zigi

Wakaazi na wadau wa mazingira mkoani Tanga wanaiomba serikali kuangalia uwezekano wa kutunga Sheria ya pamoja itakayoondoa ukinzani uliopo ili kuimarisha usimamizi endelevu katika kuwadhibiti wavamizi wanaoharibu chanzo cha maji cha Mto Zigi unaohudumia maelfu ya watu waishio jiji Tanga.

Wamesema utekelezaji wake utasaidia sana kuondoa mwingiliano wa ki sekta unaosababishwa na udhaifu wa utekelezaji wa sheria zinazosimamia rasilimali za maji pamoja na chanzo hicho kilichopo kijiji cha Sakale na maeneo ya Amani katika wilaya ya Muheza.

Wametoa maoni hayo kwa nyakati tofauti katika mahojiano na mRedio Huruma fm kuhusu namna bora ya kudhibiti shughuli endelevu za uharibifu na uchafuzi zilizodumu kwa miaka 10 sasa kwenye chanzo hicho.

Maji ya Mto Zigi ambayo hujaza bwawa la Mabayani kwa sasa ndiyo tegemeo pekee la chanzo cha maji ya kunywa kwa matumizi ya wakazi 210, 435 pamoja na viwanda katika halmashauri ya jiji la Tanga.

Mratibu wa shughuli za Mazingira wa Mamlaka ya Majisafi na Majitaka Tanga (UWASA), Ramadhani Nyambuka amesema kutokana na uharibifu unaoendelezwa bila kikomo kwenye chanzo hicho ni vema sasa serikali ikatunga Sheria ya pamoja itakayoweza kuwabana wahalifu.

Viongozi wa Bodi ya Mamlaka ya Maji safi na Majitaka Mjini Tanga walipotembelea mto Zigi mwaka jana.

Naye Mhifadhi wa Hifadhi ya Mazingira Asili ya Amani (ANR) Mwanaidi Kijazi amesema changamoto inayowakabili ni kukosekana kwa sheria inayoweza kumbana mhalifu moja kwa moja hasa anapofikishwa mahakamani.

Ofisa Misitu wa Ofisi ya Katibu Tawala (RAS) mkoa wa Tanga, Peter Nguyeye amesema kwa kuwa upo muunganiko wa moja kwa moja katika masuala yanayohusu maji, mazingira na misitu ni vema sasa watunga sera wakaona umuhimu na kutoa kipaumbele kwenye suala hilo.

Shughuli za uharibifu kwenye chanzo cha Mto Zigi zinajumuisha kilimo cha mazao ya chakula na biashara ndani ya mabonde na kingo za vijito kwa kutumia dawa za kuua magugu na wadudu, uchimbaji haramu wa Dhahabu kwenye maeneo oevu, uvunaji wa miti mingi ya yote kwa wakati mmoja kwenye msitu wa Longuza ili kupata magogo pamoja na uvuvi haramu.