MADIWANI KOROGWE WATAKIWA KUHAMASISHA UANDIKISHWAJI WA WANAFUNZI DARASA LA KWANZA.

Wito umetolewa kwa madiwani Wilayani Korogwe kutumia nafasi zao kuhimiza suala la uandikishwaji wa wanafunzi wanaotakiwa kujiunga na darasa la kwanza wilayani humo. Wito huo umetolewa na MKURUGENZI mtendaji wa halmashauri ya mji wa Korogwe Lewis Kalinjuna na amesema iwapo utaratibu huo hautafanyiwa kazi itachangia kudhoofisha halmashauri hiyo.

Sanjari na hilo amehimiza ujenzi wa maabara akisema kuwa ingawaje mambo yameendelea kwenda vizuri lakini bado kuna haja ya kujidhatiti katika upatikanaji wa samani mbalimbali kama vile meza,viti,milango,madirisha na vitu vingine vinavyohitajika katika hatua ya umaliziaji kazi hiyo.

Kalinjuna ameyasema hayo kwenye kikao cha baraza la madiwani kilichofanyika hivi karibuni wilayani humo.

Kwa upande wake katibu tawala wa wilaya ya Korogwe Lameck Stanley aliyehudhuria kikao hicho aliwataka wajumbe kuongeza jitihada za kuboresha huduma za afya kwenye hamashauri hiyo ya mji ili ambao unaonekana kkukua kwa kasi ili ziweze kuendana na hali halisi ilivyo.

Amesema kwa sasa mji wa Korogwe unaendelea kukua kwa kasi na inawezekana muda siyo mrefu wilaya ikapata hadhi ya kuwa mkoa huku akieleza kuwa itashangaza hadhi ya namna hiyo inapatikana huku huduma za msingi kama vile afya bado zikiwa hazijaimarika kulingana na wakati uliopo hivi sasa.

Naye Mwenyekiti wa CCM Korogwe mjini Immanuel Charles ameelezea umuhimu wa suala la mgawanyo wa mali kati halmashauri ya mji Korogwe na ile ya wilaya akisema kwamba hatua hiyo inapaswa kuwekwa vizuri njia ambayo italeta tija kwa vizazi vijavyo.

Ushauri huo wa Charles aliutoa kutokana na kikao hicho kuibua hoja kwamba bado kuna baadhi ya mambo hayajawa sawa tangu kugawanywa kwa halmashauri hizo ambapo awali ilikuwepo moja tu ile ya wilaya ambayo imeizaa Mji Korogwe huku baadhi ya wajumbe wakiomba kukutanishwa kupata muafaka.