"POLISI TANGA WAKAMATA MAFURUSHI YA MIRUNGI"

NA REBECA DUWE,TANGA.

Jeshi la polisi  mkoani Tanga linawashikilia watu watatu akiwemo mwanamke  mmoja kwa tuhuma za kupatikana na madawa ya kulevya aina ya Mirungi yanayokadiriwa kuwa takribani kilogramu 440 ambayo walikuwa wakiyasafirisha kwa kutumia basi la abiria kutoka Arusha kuelekea jijini Dar es salaam.

Madawa hayo ya kulevya aina ya mirungi ambayo yamekamatwa inadaiwa kuwa yalikuwa yamehifadhiwa kwenye mifuko ya viroba ipatayo 18 ambavyo vilkikuwa vimehifadhiwa kwenye basi hilo vikisafirishwa kwa ajili ya kuelekea Jijini Dar es salaam ambako watuhumiwa hao wanadaiwa kuendesha shughuli zao hizo.

Kaimu kamanda wa polisi mkoani Tanga Juma Ndaki alitoa taarifa hiyo Jan  alipokuwa  akizungumza na waandishi wa habari ofisini kwake alisema  watuhumiwa hao walikamatwa huko eneo la Chekelei wilayani Korogwe ambapo watuhumiwa bado wako mikononi mwa polisi kwa hatua zaidi za kisheria.

Ndaki aliwataja watuhumiwa hao kuwa Sara Mbwambo (38) mfanyabiashara,Rodison Sam (24) kondakta na Godfrey Machumbe (30) tani boi wote ni wakazi wa jiji la Dar es salaam na wanaelezwa kuwa walisafirisha mirungi hiyo kwa kutumia gari lenye nambari T 244 DXQ  mali ya kampuni ya Dar express. 

Kwa mujibu wa kamanda Ndaki ni kwamba watuhumiwa wote hao baada ya mahojiano ya awali na polisi wamekiri kuhusika na biashara hiyo ya usafirishaji wa madawa hayo ya kulevya aina ya Mirungi ambapo watafikishwa mahakamani mara baada ya upepepezi wa awali unaofanywa na jeshi la polisi kukamilika.

“Watu watatu wanashikiliwa na polisi wakituhumiwa kupatikana na Miringi viroba 18,walikuwa wakisafirisha kwa basi toka Arisha kwenda Jijini Dar es salaam ambapo katika mahojiano ya awali wote wamekiri kuhusika na biashara hiyo na uchunguzi ukikamilika tutawafikisha mahakamani”alisema Ndaki.

Kutokana na kuendelea kushamiri kwa lindi la wananchi kujihusisha na biashara hiyo haramu kaimu kamanda huyo wa polisi mkoa wa Tanga ametoa rai kwa umma wa watanzania kuepuka kujihusisha na uendeshaji wa shughuli hizo ambazo siyo halali ambazo pia huleta madhara makubwa kwa Taifa.

Alisema siyo vyema kwa wananchi kuendesha biashara hizo ambazo tayari zilishapigwa marufuku kisheria ambapo aliwataka kubadilika kwa kufanya kazi halali zitakazowasaidia kuendesha maisha yao badala ya zile zenye fedha nyingi ambazo zinaweza kuwapotezea ndoto zao walizokuwa nazo maishani.

Mbali na  kukamatwa kwa watuhumiwa hao wa Mirungi kamanda Ndaki pia alisema madawa ya kulevya aina ya bangi kilogramu 64 yamekamatwa yakiwa yamechanganywa na magunia ya vitunguu yakisafirishwa kwa kutumia gari aina yaToyota  Coaster lenye nambari za usajili T 560 ASJ.

Kamanda Ndaki alisema katika tukio hilo lililotokea Mombo Motel hakuna mtu aliyekamatwa akihusishwa na mzigo huo wa bangi kutokana na anayedhaniwa kuhusika kufanikiwa kukimbia wakati wa uchunguzi uliolenga kumtambua na polisi wanaendelea kumsaka ili hatua za kisheria kuchukuliwa.