AFRICA SPORT WATAMBA LIGI DARAJA LA KWANZA, WAICHAPA TESEMA 2-1.

African Sport “Wana Kimanu Manu”

Wawakilishi wa Tanga katika michuano ya Ligi Daraja la Kwanza African Sport “Wana Kimanu Manu” wameendelea kujiweka katika nafasi nzuri ya kupanda Daraja na kuingia Ligi Kuu ya Soka Tanzania Bara 2015/16 baada ya hapo jana kufanikiwa kuibuka na ushindi wa bao 2-1 dhidi ya Halmashauri ya Manispaa ya Kinondoni(K.M.C) maarufu kama Tesema Fc.

Mchezo huo ulichezwa katika Dimba la CCM Mkwakwani jijini Tanga kuanzia saa 10 jioni ambapo African Sport walikuwa wa kwanza kupata bao kunako dakika ya 34 kwa njia ya penalt iliyotolewa na mwamuzi baada ya Mshambuliaji wao tegemeo Ahmed Shiboli kufanyiwa madhambi katika eneo la hatari la Tesema Fc, na penalt hiyo kupigwa na Ali Ramadhani a.k.a “KAGAWA”.Mpaka kipindi cha kwanza kinamalizika African Sport walikuwa mbele kwa bao kwa 0.

Winga machachari wa A.Sport Maulid Abas aliyeingia kipindi cha pili alikuwa moto kwa safu ya ulinzi ya Tesema na kunako dakika ya 64 ya mchezo aliambaa na mpira winga ya kushoto huku akuwahadaa mabeki wa Tesema kwa chenga za maudhi kisha akaingiza krosi ya chinichini iliyomkuta mshabuliaji Ahmed Shiboli naye hakufanya ajizi akaburuza pasi ya chinichini ambayo ilimshinda mlinda mlango wa Tesema na kumfikia Nahodha wa African Sport James Mend ambaye alikuwa pekeyake na kupasia nyavu kiulaini.

Tesema Fc walipata bao la kufutia machozi muda mfupa kabla ya mchezo kumalizika dakika ya 84 baada ya kutokea piga nikupige langoni kwa African Sport na Ben Ngasa kuipatia timu yake bao.Kwa ujumla African Sport walitawala kipindi cha kwanza cha mchezo na Tesema kipindi cha pili hasa mwishoni ambapo mashabiki wa African Sport walikuwa nyumbani walijikuta wakiomba mpira uishe.

Nyota wa mchezo huo alikuwa winga nambari 7 wa Tesema FC Seif Abdallahaman Karihe.

Kwa matokeo hayo A.Sport wamefikisha Points 32 katika nafasi ya pili baada ya michezo 16 na mchezo uja watakuwa nyumbani kuwakaribisha Villa Squad hapo January 18.

Msimamo kwa timu 6 za juu(kwa Mujibu wa Tovuti ya TFF)

Pos	Team	Pld	W	T	L	Goals	Diff	Pts
1	Majimaji	16	10	5	1	21:8	13	35
2	African Sports	16	10	2	4	20:14	6	32
3	Lipuli	16	7	7	2	11:7	4	28
4	Friends Rangers	16	6	8	2	17:12	5	26
5	Tessema	16	6	3	7	9:12	-3	21
6	Ashanti United	16	5	4	7	18:23	-5	19