MOTO MKUBWA WAZUA BALAA AIR PORT TANGA.

MOTO mkubwa umezuka na kusababisha taharuki katika uwanja wa ndege wa Majanimapana Tanga, jana majira ya saa tisa alasiri na kuwalazimu abiria kusubiria zaidi ya saa tatu kuendelea na ratiba zao.

Moto huo uliochukua zaidi ya saa 13 kuzimwa kwa kusaidiana na wanafunzi wa Chuo cha Anga cha Kijeshi umeripotiwa kuanzia kwenye nyasi sehemu ya kurukia ndege.

Kaimu kamanda wa Jeshi la Polisi Mkoa wa Tanga, Juma Ndaki, aliwaambia waandishi wa habari leo kuwa tukio hilo ambalo chanzo bado hakijafahamika liliathiri ratiba ya safari kwa wasafiri wa kisiwani Pemba na Unguja.

Vikosi vya zimamoto Tanga

Mmoja ya wasafirishaji wa kampuni ya ndege ya Coastal Aviation Mohamed Ahmad, amesema ndege yao ililazimika kuzunguka karibu dakika 15 angani kutafuta mwelekeo wa kutua kukwepa moshi uliokuwepo jirani na njia ya kurukia ndege na kisha kutua salama majira ya saa 10:00 jioni.

Nao wananchi wanaoishi pembezoni mwa uwanja huo ambao ni wa pekee Mkoani Tanga wameeleza kuwa sio jambo la kushangaza kushuhudia moto kwenye uwanja huo jambo lililoungwa mkono na Afisa wa uwanjani hapo ambae hakutaka jina lake kutajwa.