HALMASHAURI YA JIJI LA TANGA LAWAMANI KWA UCHAFU ULIOKOTHIRI SOKO LA SAMAKI DEEP SEA TANGA.

Wachuuzi wa Samaki wakiwa Sokoni hapo kusubiri wavuvi

Na Godwin Henry .Tanga

Soko maarufu la Samaki la Deep Sea la jijini Tanga liko katika hali yatari kutokana na uchafu uliokithiri kusambaa kwenye soko hilo.Wakiongea na mwandishi wa Habari hizi baadhi ya wafanyabiashara wa Soko hilo wamebainisha kuwa hakuna dampo la kutupa takataka hali ambayo inawalazimu watuamiaji kutupa hovyo.

Mwandishi ameshuhudia takataka nyingi zikiwa zimejikusanya kando ya bahari na pembezoni migahawa ya chakula na kutoa harufu mbaya.

Huduma Ya Vyoo

Huduma ya vyoo nayo imesitishwa kwa muda mrefu sasa na kuwalazimu watumiaji wa soko hilo hasa Mama Ntilie na Wavuvi kujisaidia kwenye vichaka kando ya Bahari hali inayohatarisha afya zao kwani ni rahisi kutokea kwa magonjwa ya milipuko.

Baadhi ya wavuvi wamezungumza na mwandishi wa habari hizi na kueleza kuwa vyoo ambavyo vilijengwa kwenye Soko hilo vimeharibika kutokana kujengwa chini ya viwango.

“Ni muda mrefu sasa tunajisaidia kwenye vichaka kando ya bahari kwa sababu hatuna njia nyingine” alisema Mkombozi Athumani ambaye ni mvuvi.

Huduma za Maji,Umeme na Barabara

Nazo huduma muhimu za Umeme na maji zimesitishwa pia kutokana na usumamizi mmbovu na kusababisha adha kubwa kwa watumiaji wa soko hilo kwani Samaki huitaji kuandaliwa kwa usafi na maji ya kutosha kabla ya kuuzwa kwa mteja.

Barabara inayoingia Sokoni hapo ni mbovu na ina mashimo makubwa kiasi ambacho mabari yanashindwa kuingia na kulazimika kupaki kando ya barabara ya kwenda bandarini eneo amblo si salama kwani malori makubwa ya mizigo hupita kwa kasi.

Makusanyo ya  Ushuru.

Pamoja na Matatizo hayo  Halmashauri ya jiji la Tanga kupitia watendaji wake imeendela kuwatoza kodi watumiji wa soko hilo wa sh 3000/= kwa wavuvi kulingana na samaki aliowavua,sh 200/= kwa kila ndoo 1 ya Samaki kwa Wafanyabiashara na leseni ya sh 16000/= kwa mwaka kwa Mama Ntilie wanaopika na kuuza vyakula soko ni hapo.

Soko hilo kongwe linatumiwa na zaidi ya Wafanyabiashara 50 wanaouza samaki, wavuvi kutoka maeneno mbalimbali, Migahawa zaidi ya 12 ya Mama Ntilie na wanunuzi wengi kutoka ndani na nje ya jiji la Tanga.

Uongozi wa Jiji

Mwandishi wa Habari hizi alishindwa kuupata Uongozi wa Halmashauri ya jiji la Tanga ili kutoa majibu ya kero hizo kutokana na Ofisi zake kufungwa kupisha sikukuu ya miaka 51 ya Mapinduzi ya Zanzibar.