MAJAMBAZI YAUA MLINZI WA KITUO CHA MAFUTA LAKE OIL CHA KANGE JIJINI TANGA.

MTU mmoja aliyefahamika kwa jina la Omary Salim mwenye umri wa miaka 42 mkazi wa Tanga na mlinzi wa kituo cha mafuta Lake Oil cha Kange jijini Tanga ameuawa kwa kupigwa na nyundo kichwani kisha kuporwa silaha aina ya shortgun yenye risasi mbili.

Katika tukio hilo pia mlinzi mwingine Elisha Yohana mwenye umri wa miaka 48 mkazi wa Kange Kasera amejeruhiwa kwa kupigwa sehemu mbali mbali za mwili na kisha kufungwa kwa kamba.

Akithibitisha kutokea kwa tukio hilo kamanda wa Polisi mkoani hapa, Frasser Kashai amesema tukio hilo limetokea mnamo  octoba 10mwaka huu majira ya saa 8 usiku.

Majeruhi amelazwa hospitali ya Bombo na hali yake inaendelea vizuri na msako na upelelezi wa tukio hilo unaendelea

Katika tukio jingine…

Mwili wa mtu mmoja aliyefahamika kwa jina la Saida Salimu mwenye umri wa miaka 62 mkulima mkazi wa Bumbuli umegundulika ukiwa umeharibika  baada ya kuuawa kwa kukatwa na panga mgongoni na mtu/watu wasiofahamika wakati akiwa shambani.

Tukio hilo limetokea Octoba 10 mwaka huu majira ya saa 1 jioni huko Mibuyu Mitatu Kitongoji cha Buhosi Kata ya Mtindiro tarafa ya Muheza Wilaya ya Muheza.

Hata hivyo Kamanda Kashai amesema kwamba mwili wa marehemu umezikwa na msako mkali wa kuwatafuta waliohusika na mauaji hayo unaendelea.