MSHAMBULIAJI MPYA COASTALA UNION AMWAGA CHECHE HAKUNA CHA JAJA WALA TAMBWE.

Mshambulaji wa Coastal Union aliyesajiliwa kutoka timu ya Gormahia ya Kenya Itubu Imbem kushoto akiwa na Meneja wa timu ya Coastal Union,Akida Machai mara baada ya kusaini mkataba wa miaka mwii wa kuitumia timu hiyo hivi karibuni

MSHAMBULAJI Mpya wa Klabu ya Coastal Union Itubu Imben raia wa Kongo aliyetokea timu ya Gorhamia ya Kenya Itubu Imbem jana alianza kuonyesha cheche zake baada ya kuifungia timu hiyo mabao matatu wakati Coastal Union ikiifunga Falcon FC ya Pemba mabao 10-0,katika mchezo wa kirafiki uliofanyika kwenye uwanja wa soka Gombani.

Falcon Fc inashiriki Michuano ya Ligi daraja la kwanza visiwani humo ambapo ilikutana na dhahama hiyo ya mabao kutoka kwa wachezaji mahiri ambao wamesajiliwa msimu mpya wa ligi kuu ya Vodacom Tanzania bara.

Wakionekana kujiamini na kujipanga vilivyo,Coastal Union waliweza kuendeleza wimbi la mashambulizi langoni mwa wapinzani wao hao na kufanikiwa kupata mabao hayo ambapo mpaka timu hizo zinakwenda mapumziko Coastal Union walikuwa mbele kwa mabao 5-0.

Mabao ya Coastal Union mengine yalifungwa na Abasi Athumani ambaye alipachika mabao matatu kwenye mchezo huo wakati Mahundi Petro na Mbwana Hamisi kila mmoja akipachika bao moja langoni mwa timu hiyo.

Katika kuhakikisha Coastal Union inaendelea kuibuka na idadi kubwa ya mabao iliweza kuendelea kasi ya mashambulizi langoni mwa Falcon na kufanikiwa kuandika mabao mengine ambapo Rama Salim mchezaji mahiri naye aliyetokea klabu ya Gormahia ya Kenya ambaye pia aliwahi kuichezea Harambee Stars ya nchi hiyo aliweza kuandika mabao mawili na kuhitimisha karamu ya mabao.

Akizungumzia hali ya kikosi hicho,Kocha Mkuu wa timu hiyo,Yusuph Chippo alisema kuwa kutokana na maandalizi waliyoyafanya wakiwa visiwani humo wanamatumaini makubwa ya kufanya vizuri katika michuano ya Ligi kuu soka Tanzania bara itakayoanza Septemba 20 mwaka huu.

“Ninaweza kusema hivi kuwa sasa kikosi changu kimeimarika kwani hapo juzi tuliifunga timu ya Opec ya Visiwani hapa mabao 11-0  hivyo kikosi changu kipo tayari kushiriki michuano ya Ligi kuu soka Tanzania bara msimu ujao na hasa tukianzia na mechi yetu na Simba kwa kuchukua pointi tatu muhimu “Alisema Chippo.