ATAKAE KAIDI KUFANYA USAFI KWENYE ENEO LAKE JIJINI TANGA KUKAMATWA "MEYA ACHARUKA"

Mstahiki Meya wa jiji la Tanga, Omar Guledi

Na Mwandishi Wetu.TANGA

Mstahiki Meya wa jiji la Tanga, Omar Guledi, ametoa agizo kwa mabalozi wa nyumba  kumi na wenyeviti wa Serikali za mitaa kuwahamasisha wananchi kuweka mazingira ya usafi maeneo yao na atakaekaidi achukuliwe hatua za kisheria.

 

Meya Guledi ameyasema hayo wakati akizindua mradi wa utunzaji na uhifadhi wa mazingira kwa kata ya Nguvumali na kushirikisha viongozi wa kata, Serikali za mitaa na viongozi wa dini ambapo amesema magonjwa ya milipuko na homa za mara kwa mara hazitoisha hadi jamii yenyewe itakapobadilika juu ya usafi wa  mazingira na usalama wa Afya zao.

Amesema kufuatia kukaribia kwa msimu wa mvua ni wajibu wa kila kaya kuweka mazingira ya usafi katika maeneo yao ikiwa na pamoja na kuifanyia usafi mifereji iliyoziba ili kuwa rahisi mvua inaponyesha maji kutembea.

Naye Katibu wa Asasi ya Nguvumali Commity Development of Enviromment (NCDE), Frank Mgunda, amesema kumeongezeka vitendo vya uharibifu wa mazingira hivyo asasi hiyo itafanya kampeni ya nyumba kwa nyumba kutoa elimu ya mazingira kwa kuanzia mjini hadi vijijini kabla ya msimu wa mvua kuanza.