WIZI WA KARAFUU TATIZO PEMBA.

Wakulima wa Karafuu wa kianika zao hilo(Picha na Makataba)

Baada ya kukithiri kwa vitendo vya wizi wa karafuu kwa  kukatwa  matawi au mashina ya mkarafuu , wakulima wa zao hilo  Kisiwani Pemba wameitaka Serikali kuandaa utaratibu wa kuuhifadhi na kuulinda mkarafuu ili  uendelee kuwa tegemeo la Uchumi wa Taifa .

Wamesema kuwa iwapo Serikali haitajaweka utaratibu wa kuulinda na kuuhifadhi mkarafuu upo uwezekano wa zao hilo kupoteza hadhi kwani wizi wamekuwa wakiikata mikarafuu na kisha kwenda kuchambulia sehemu nyingine  na kisha karafuu kuziuza kwa wafanyabiashara wa magendo  kwa njia ya vikombe na pishi .

Baadhi ya wakulima wa karafuu  wamesema kuwa kutokana na kukithiri kwa vitendo hivyo na wahusika wanaowakamata kushindwa kuchukuliwa hatua na vyombo vya Sheria , hali hiyo inaweza kusababisha wajichukulie sheria mikononi mwao .

Mkuu wa Mkoa wa Kaskazini Pemba Omar Khamis Othman akizungumzia tatizo hilo amewataka wakulima kuondoa rushwa muhali wakati wanapo wakamata watu wakiwa wanafanya hujuma kwenye mashsmba ya mikarafuu ili waweze kuchukuliwa hatua kwa mujibu wa sheria .

Hata hivyo Mkuu huyo wa Mkoa amewtaka wakulima kushirikiana na vyombo vya ulinzi na usalama katika kufanikisha ulinzi na uhifadhi wa mkarafuu na karafuu kwani mkarafuu ukikatwa mkulima hawezi kupata karafuu.