WAKUU WA IDARA PEMBA WATAKIWA KUTOA FURSA ZA KIELIMU KWA WATUMISHI.

Na Masanja Mabula PEMBA

Mkuu wa Mkoa wa Kaskazini Pemba Mhe Omar Khamis Othman amewataka wakuu wa Idara za Serikali na binafsi kutoa fursa kwa wafanyakazi wao kujiendeleza kielimu ili waweze kukabiliana na changamoto za mabadiliko ya Kilelimu zinazojitokeza siku hadi siku.

Amesema kuwa kila Mkuu wa Idara za Serikali na binafsi anapaswa kuhakikisha wafanyakazi wake wanajiendeleza kielimu  ili kukidhi matakwa ya urandawazi .

Kauli hiyo ameitoa wakati akizungumza kwenye kilele cha Shereha za maadhimisho ya juma la Elimu ya watu wazima  ambapo kwa Pemba  zilizofanyika katika viwanja vya Skuli ya Shengejuu Wilaya ya Wete.

Aidha Mkuu huyo wa Mkoa ametoa wito kwa vijana walioshindwa kuendelea na masomo ya kidato cha tatu na nne katika skuli za Serikali kujiunga na vituo vya kujiendeleza vilivyo katika mikoa ya Pemba .

Mhe Omar amewahimiza msheha kushirikiana na walimu wakuu kuorodhesha vijana walioacha Skuli ili wafunguliwe madarasa ya Elimu Mbadala katika shehia zisizo na madarasa ya kisomo .

Kwa upande   wake Mtatibu wa Elimu ya Mbadala na watu wazima Pemba Mwalim Hija hamad Issa amesema kuwa lengo la Idara hiyo ni kuhakikisha kuwa vijana wote waliokosa elimu ya lazima wanajiunga na madarasa ya kisomo cha watu wazima .