WAKUU WA IDARA HALMASHAURI YA WILAYA YA MUHEZA WAGOMBEA GARI NA MWENYEKITI WAO

Mkuu wa Wilaya ya Muheza Bi Subira Mgallu

(Picha na Maktaba)

BAADHI ya Wakuu wa Idara wilayani Muheza, Tanga, wamemlalamikia Mwenyekiti wa Halmashauri hiyo Amiri Kiroboto, kuwa amekuwa akitumia magari kinyume na taratibu hali inayowafanya washindwe kufanyakazi zao kwa wakati.

Akizungumza na tovuti ya Fullshangwe kwa njia ya simu juzi, kwa masharti yakutoandikwa jina lake gazetini, mmoja wa Wakuu wa Idara hizo, alisema, Sheria za Tamisemi zinasema siku za kufanyakazi kwa wenyeviti wa Halmashauri zote Tanzania ni mbili ambazo ni Jumatau na Alhamisi, labda kama inapotokea dharula nje ya siku hizo.

Alisema mwenyekiti huyo amekuwa akifika ofisini kila siku kama vile watendaji wengine na kuamua kuchukua gari la Idara kama ni elimu au yeyote na kuondoka nalo pamoja na dereva anakojua hali inayokwamisha shughuli za watendaji husika pindi wanapotaka kulitumia gari husika kikazi.

Mkuu huyo wa Idara, alisema Mwenyekiti huyo, amekuwa akiyatumia magari hayo hata siku za mapunziko kwa matumizi yake binafsi kama vile kwenda nayo katika mashamba yake ya Kwarubuye, Kivindo na Mwarimba, huku madereva wakilipwa na halmashauri hiyo.

Alisema kuwa,  mwenyekiti huyo, amekuwa akitumia lita 80 za mafuta hadi 100 kwa wiki ili hali alitakiwa kutumia lita 20 katika siku mbili hizo alizopangiwa, ambazo ni kumfuata nyumbani na kumpeleka kazini na kumrudisha.

Alipotafutwa, Kiroboto ili kutoa ufafanunuzi kuhusu tuhuma hizo, alisema, hao wamekosea kwa sababu kama kweli hilo lipo basi lilikuwa linazungumzika lakini kama wamekimbilia huko basi huo ni utashi mdogo wakutoelewa taratibu za kazi.

“Hayo madai si sahihi, tayari tumeishaingia katika kipindi kigumu cha uchaguzi sasa watu wanatafuta sababu yakunichafua kupitia katika matumizi mabaya ya magari kitendo ambacho nilikikwepa kwa muda mrefu hata hivyo mimi nina magari yangu ambayo ndiyo ninayoyatumia kwenye shughuli zangu,”alisema Kiroboto.  

Kiroboto, lisema hayo ni majungu katika sehemu za kazi, wanapaswa kujua kuwa kunawakati anakuwa na kazi za dharura, sasa wanapomuona na gari la Halmashauri basi wajue kuwa yuko kazini na si vinginevyo kama wanavyodai.