MGANGA WA KIENYEJI ATUPWA LUPANGO KWA UBAKAJI PEMBA.

Na Masanja Mabula. PEMBA

Mganga wa Jadi Rashid Omar Ibrahim (40) wa Chamboni Wilaya ya Micheweni amepelekwa rumande kwa kipindi cha siku kumi na mahakama ya Wilaya ya Wete baada ya kufikishwa mahakamabni akikabiliwa na tuhuma za ubakaji.

Imedaiwa mahakamani hapo na Mwendesha mashitaka Mkaguzi wa Polisi Fakih Yussuf  mbele ya hakimu wa mahakama hiyo Rashid Machano Magendo kuwa mtuhumiwa huyo ametenda kosa hilo februari 20 mwaka huu .

Ameeleza kwamba siku ya tukio huko Kitambuu Mchangamdogo Wilaya ya Wete , mtuhumiwa huyo alimwingilia mwanamke mwenye umri wa miaka 40 na kumsababishia maumivu makali .

Mwendesha mashtaka wa Polisi amezidi kufahamisha kwamba kosa hilo ni kinyume na kifungu cha 125 (I) ,(2) na kifungu cha 126 (I) cha Sheria namba 6 ya mwaka 2004 sharia za Zanzibar .

Baada ya kusomewa shitaka lake mtuhumiwa huyo hakutakiwa kujibu loloteb kutokana na mahakama hiyo kutokuwa na uwezo wa kusilikiza kesi za aina hiyo ambapo amepelekwa rumande hadi tarehe 9 mwezi huu kesi itakapokuja kutajwa tena katika mahakama ya Mkoa.