"MECKY MEXIME HAKUNAGAA" AIONGOZA MTIBWA MECHI 5 KUSHINDA 4 NA SARE 1.

TIMU ya Mtibwa Sugar, imeendeleza wimbi la ushindi na kubaki kuwa moja kati ya timu 2 ambazo hazijafungwa katika Ligi Kuu, baada ya kuifunga Mbeya City ya Hapa kwa mabao 2-0 katika pambano kali kwenye Uwanja wa Sokoine hapo jana.

Kocha Mtibwa Sugar “MECKY MEXIME”

Ushindi huo umeiweka juu zaidi timu ya Mtibwa Sugar kwa toafuti ya pointi tatu, baada ya kuifanya kufikisha pointi 13, huku ikiziacha Yanga na Azam FC zikibanana katika nafasi ya pili kwa kuwa na pointi 10 baada ya mechi tano tano kwa kila kikosi tangu kuanza kwa msimu huu wa 2014/15.

Bao la kwanza la Mtibwa Sugar lilifungwa dakika ya 20 na nyota wake Ame Ally, akiunganisha kona iliyopigwa na beki wa kushoto wa zamani wa Yanga anayekipiga na ‘Wakata Miwa’ hao kwa sasa, David Luhende. Baada ya bao, Mtibwa waliendelea kuishambulia Mbeya City na nusura wapate bao la pili dakika ya 31 kupitia Ally Shariff. hadi mapumziko, matokeo yalikuwa wageni kuongoza mechi kwa bao hilo 1-0 dhidi ya wenyeji wao ambao msimu huu unaonekana kuwa mgumu kwao.

Kipindi cha pili kilianza kwa kasi ya aina yake Mbeya City wakipania kusawazisha bao, ambako walianza na badiliko la kumtoa Themi Felix na nafasi yake kuchukuliwa na Peter Malyanzi, ambaye nusura aipatie timu yake bao la kusawazisha, lakini shuti lake dakika ya 53 lilidakwa na kipa wa Mtibwa Said Mohammed.

Dakika ya 76, Mtibwa wakajihakikishia ushindi muhimu, kutokana na bao maridadi la Andrew Vicent, alilofunga baada ya kuwalaamba chenga mabeki wa Mbeya City na kufumua shuti kali na kumshinda kipa David Burhani.

Dakika moja kabla ya filimbi ya mwisho ya mwamuzi Hashimu Abdallah wa Dar es Salaam, Mtibwa nusura wapate bao la tatu, lakini shuti la adhabu ndogo nje ya boksi, iliyotokana na Vicent kuchezewa rafu, kupaa nje ya lango. Hadi mwisho, Mtibwa Sugar 2 Mbeya City 0.Timuu nyingine ambayo haijapoteza mchezo mpaka sasa ni Simba Sport Club.

Vikosi katika pambano hilo vilipangwa hivi, Mbeya City: David Burhani, Kenny Ally, Hassan Mwasapili, Deogratius Julius, Yohana Morris, Yusuph Abdallah, Deus Kaseke, Steven Mazanda, Paul Nonga, Saad Kipanga na Themi Felix.

Mtibwa Sugar: Mtibwa Sugar, Said Mohammed, David Luhende, Salim Mbonde, Andrew Vicent, Shabani Nditi, Mussa Hassan ‘Mgosi’, Mohammed Ibrahim, Ame Ally, Mussa Nampaka na Ally Shariff.

Dakika 90 za mchezo wa ligi kuu ya Tanzania Bara kati ya Yanga ya jijini Dar es salaam na Stand United, zilimalizika huku Yanga wakiibuka na ushindi mnono wa mabao 3-0, bao la kwanza likifungwa na Jelson Jaja la pili na la tatu yakifungwa na Jerson Tegete katika mchezo uliopigwa Oct 25 mwaka huu. 

Wakati Yanga wakishinda mabao 3-0 Watani wa Simba wao wameendeleza rekodi yao ya kutoka sare, ambapo hadi sasa tayari wameshacheza mechi tano na wakiwa na Pointi tano, huku katika mchezo wa leo wakitoka sare ya bao 1-1 na Tanzania Prisons huko jijini Mbeya.

MATOKEO- Mechi zilizopita:

Jumamosi Oktoba 25

Stand United 0 Yanga 3

Azam FC 0 JKT Ruvu 1

Prisons 1 Simba 1

Kagera Sugar 1 Coastal Union 1

Ruvu Shooting 1 Polisi Moro 0

Ndanda FC 0 Mgambo JKT 1

LIGI KUU VODACOM

MSIMAMO:

NA	TIMU	P	W	D	L	F	A	GD	PTS
1	Mtibwa Sugar	5	4	1	0	8	1	7	13
2	Azam FC	5	3	1	1	6	2	4	10
3	Yanga	5	3	1	1	7	4	3	10
4	Coastal Union	5	2	2	1	6	4	0	8
5	JKT Ruvu	5	2	1	2	4	5	-1	7
6	Ruvu Shooting	5	2	1	2	4	5	-1	7
7	Kagera Sugar	5	1	3	1	3	2	1	6
8	Mgambo JKT	5	2	0	3	2	4	-2	6
9	Tanzania Prisons	5	1	2	2	5	5	0	5
10	Simba	5	0	5	0	5	5	0	5
11	Mbeya City	5	1	2	2	1	2	-1	5
12	Stand United	5	1	2	2	3	8	-5	5
13	Ndanda FC	5	1	0	4	7	10	-3	3
14	Polisi Moro	5	1	2	2	3	6	-3	3