BREAKING NEWSS...POLISI TANGA YAKAMATA SILAHA NA WAHALIFU WA MKASA WA AMBONI, SASA HALI SHWARI 100%.

Kamanda wa polisi Mkoani Tanga, Leonard Poul, akiwaonyesha waandishi wa habari jambia na kisu silaha zilizodaiwa kutumika katika tukio la mauaji ya watu 8 kuchinjwa na watu wanaodaiwa kuwa majambazi tarehe 31/05 2016 kijiji cha Kibatini kata ya Mzizima Amboni Tanga.

JESHI La Polisi Mkoani Tanga, limesema limekamata Silaha na vifaa mbalimbali vilivyokuwa vikitumika kwenye matukio ya uhalifu na mauaji vikiwemo visu na majambia.

Akizungumza waandishi wa habari ofisini kwake leo, Kamanda wa polisi Mkoani Tanga, Leonard Poul, alisema kukamatwa kwa vifaa hivyo kunatokana na ushirikiano na vyombo vya usalama na wananchi.

Alisema kwa sasa Mapango ya Amboni yako salama kwa asilimia mia moja na hakuna kitisho wala masalia ya majambazi na kuwataka wananchi kufanya kazi zao za kila siku bila woga.

Amesema katika msako huo ambao ulifanywa tangu kutokea tukio la mauaji ya watu nane huko Amboni Polisi wamekuwa wakifanya kazi usiku na mchana na kufanikiwa kukamata watu watatu ambao walitoa ushirikiano kwa kuonesha maficho ya silaha ambapo walikuta shehena ya silaha zikiwemo bunduki tatu aina ya aina ya SMG, risasi 23 na majambia pamoja na mapanga.

Pamoja na Silaha hizo Jeshi la Polisi limekamata vyombo na madumu ya maji pamoja ,vyakula kama utumbo wa Ng’ombe na Mbuzi ambao walikuwa wakichinja pamoja na vifaa vya kujengea zikiwemo Sururu.