BREAKING NEWSS.."RAIS MAGUFULI AMTEUA KASSIM MAJALIWA KUWA WAZIRI MKUU MPYA WA TANZANIA"

Rais wa Jamhuri ya Muungano wa Tanzania Dr John Magufuli amemteua Mbunge wa Ruangwa Majaliwa Kassim Majaliwa (Pichani) kuwa Waziri Mkuu wa awamu ya tano ya Serikali ya Jamhuri ya Muungano wa Tanzania.

Uteuzi wa Mh Majaliwa Kassim kuwa Waziri Mkuu umekuwa tofauti kabisa na ilivyokuwa inadhaniwa na wananchi wengi kwani jina lake halikuwa miongoni mwa majina yaliyokuwa yakitajwa sana.

Akisoma barua iliyokuwa na jina iliyowasiliswa bungeni mapema leo na mpambe wa Rais, Spika wa Bunge Mh Job Ndugai alisema kuwa barua hiyo ilikuwa ndani ya bahasha tatu tofauti.

Aidha, Rais Magufuli aliandika kwa mkono wake mwenyewe, barua hiyo haikuchapwa kama ilivyozoeleka.

Majaliwa Kasim ambaye alikuwa Naibu Waziri Ofisi ya Waziri Mkuu TAMISEMI kwenye Serikali ya awamu iliyopita, jina lake litathibishwa na bunge leo Alhamis Novemba 19 kwa kupigiwa kura za ndio au hapana.

Majaliwa Kassim ana umri wa miaka 54, amezaliwa Disemba 22, 1960, amekuwa mbunge wa Ruangwa tangu mwaka 2010.

Baada ya kuthibitishwa na Bunge, Kassim Majaliwa ataapishwa na Rais John Magufuli kuwa Waziri Mkuu wa Serikali ya awamu ya tano.

Aidha kwa upande wa ratiba ya bunge, baada ya zoezi la kumthibitisha Waziri Mkuu kukamilika, wataendelea na zoezi la kumchagua Naibu Spika ambapo Dr Tulia Ackson aliyepitishwa na CCM kuwania wadhifa huo, anatarajiwa kuibuka kidedea kutokana na idadi kubwa ya wabunge wa chama hicho bungeni.

Hali ya Bunge baada ya kutajwa kwa jina la Kassim Majaliwa lililipuka kwa shangwe kwa wabunge wote kwani hawakutegemea na kuwa hali ya ‘surprise’.