TAARIFA ZA UTEUZI WA RAIS KWA WAKUU WA MIKOA NA NAFASI MBALIMBALI.

RAIS Jakaya Kikwete

RAIS Jakaya Kikwete amefanya uteuzi mbalimbali, ikiwemo wakuu wawili wapya wa mikoa. Hatua hiyo inaziba nafasi zilizoachwa wazi na viongozi wa nafasi hizo, wanaowania ubunge wa Jamhuri ya Muungano wa Tanzania.

Wakuu wa mikoa wawili wapya ni Amos Makalla, aliyeteuliwa kuwa Mkuu wa Mkoa wa Kilimanjaro na Jordan Rugimbana, aliyepelekwa mkoani Lindi. Taarifa iliyotolewa jana na Katibu Mkuu Kiongozi, Balozi Ombeni Sefue ilieleza kuwa uteuzi huo wa Rais, umeanza Septemba 12 mwaka huu.

Wakuu wapya wa mikoa, wataapishwa Septemba 16, Ikulu jijini Dar es Salaam. Taarifa hiyo iliyosambazwa kwa vyombo vya habari na Kurugenzi ya Mawasiliano ya Rais, Ikulu, jana, ilieleza kuwa katika uteuzi huo, Rais Kikwete pia amewahamisha wakuu wawili wa mikoa, Mwantumu Mahiza aliyekuwa Mkuu wa Mkoa wa Lindi kwenda kuwa Mkuu wa Mkoa wa Tanga na Saidi Magalula amehamishiwa kuwa Mkuu wa Mkoa wa Rukwa akitokea Mkoa wa Tanga.

Magalula anachukua nafasi iliyoachwa wazi na Stella Manyanya, aliyekuwa Mkuu wa Mkoa wa Rukwa, ambaye sasa anawania ubunge jimbo la Nyassa mkoani Ruvuma kwa tiketi ya CCM.

Pia Manyanya alikuwa Mbunge wa Viti Maalumu (CCM) akiwakilisha Mkoa wa Ruvuma. Makalla ni Naibu Waziri wa Maji na alikuwa Mbunge wa Mvomero mkoa Morogoro, aliyemaliza muda wake.

Makalla anachukua nafasi iliyoachwa wazi na Leonidas Gama, anayewania ubunge jimbo la Songea Mjini mkoani Ruvuma kwa tiketi ya CCM. Rugimbana ambaye alikuwa Mkuu wa Wilaya ya Morogoro anakuwa Mkuu wa Mkoa wa Lindi, kuchukua nafasi iliyoachwa wazi na Mahiza aliyehamia Tanga.

Kabla ya kuhamishiwa Morogoro, Rugimbana aliwahi kuwa Mkuu wa Wilaya ya Kinondoni jijini Dar es Salaam. Wakati huo huo, Rais Kikwete amemteua Profesa Muhammed Bakari Kambi kuwa Mganga Mkuu wa Serikali.

Kabla ya uteuzi Profesa Kambi alikuwa Mhadhiri wa Chuo Kikuu cha Tiba na Afya Shirikishi cha Muhimbili (MUHAS), Dar es Salaam. Kikwete pia amemteua Dk Tulia Ackson kuwa Naibu Mwanasheria Mkuu wa Serikali.

Kabla ya uteuzi huo, Dk Ackson alikuwa Mhadhiri wa Sheria katika Chuo Kikuu cha Dar es Salaam. Pia, Rais amemteua Victoria Mwakasege kuwa Balozi wa Tanzania nchini Malawi.

Kabla ya uteuzi wake, Mwakasege alikuwa Naibu Balozi wa Tanzania nchini Burundi. Katika uteuzi wa Rais, pia amewateua Makamishna wawili wa Tume ya Taifa ya Uchaguzi (NEC).

Makamishna hao ni Mary Longway na Asina Omari. Longway ni Jaji mstaafu wa Mahakama Kuu ya Tanzania na Omari ni Wakili wa Kujitegemea. Makamishna hao wataapishwa Ikulu, Dar es Salaam kesho. Rais pia amemteua Mlingi Mkucha kuwa Mtendaji Mkuu wa Shirika la Maendeleo ya Taifa (NDC).

Mkucha anachukua nafasi iliyoachwa wazi na Gideon Nassari, aliyestaafu kwa mujibu wa sheria. Aidha, Rais amemteua Msaidizi wa Rais wa Diplomasia, Balozi Samwel Shelukindo kuwa Mkurugenzi wa Idara ya Afrika katika Wizara ya Mambo ya Nje na Ushirikiano wa Kimataifa.

Katika uteuzi huo, pia Kikwete amemteua Zuhura Bundala kuwa Balozi na Msaidizi wa Rais (Diplomasia) kujaza nafasi iliyoachwa na Shelukindo. Kabla ya uteuzi wake, Bundala alikuwa Mkurugenzi Msaidizi na Kaimu Mkurugenzi, Idara ya Afrika.

Aidha, Rais amewateua wakurugenzi wengine wanne wa wizara hiyo na kuwapandisha cheo kuwa mabalozi. Walioteuliwa ni Abdallah Kilima ambaye anakuwa Balozi na Mkurugenzi wa Idara ya Mashariki ya Kati.

Kabla ya uteuzi huo Kilima alikuwa Ofisa Ubalozi Mkuu, Ubalozi wa Tanzania, Muscat, Oman. Wengine ni Baraka Luvanda anayekuwa Balozi na Mkurugenzi wa Idara ya Sheria. Kabla ya uteuzi alikuwa Mratibu wa Ofisi ya Katibu Mkuu Kiongozi, Ikulu.

Yumo pia Innocent Shiyo anayekuwa Balozi na Mkurugenzi wa Idara ya Ushirikiano wa Kikanda. Kabla ya uteuzi huo Shiyo alikuwa Mkurugenzi Msaidizi katika Idara hiyo hiyo. Kikwete amemteua Anisa Mbega kuwa Balozi na Mkurugenzi wa Idara ya Diaspora. Kabla ya uteuzi wake alikuwa Mkurugenzi Msaidizi, Ubalozi wa Tanzania, Kampala, Uganda.