MCHEZAJI WA COASTAL AFIA DIMBANI, MANARA ALILIA MWAMUZI, MINZIRO ABWAGA MANYANGA RUVU,..!! click hapa usome zaidi

AZAM KAMA YANGA “YAENDELEZA DOZI KWA MBEYA CITY”

Kikosi cha Azam FC kimeendeleza ushindi katika Ligi Kuu Bara baada ya kushinda kwa maba 2-1 dhidi ya Mbeya City katika mechi iliyopigwa kwenye Uwanja wa Azam Complex, Chamazi jijini Dar es Salaam.

Azam ilianza Ligi Kuu Bara kwa kuichaa Prisons bao 2-1, ikaendeleza kipigo cha 2-0 kwa Stand United kabla ya kuitandika Mwadui FC 1-0.Sasa ina pointi 12 sawa na Yanga na Mtibwa Sugar ambazo hazijapoteza hata mechi moja katika nne zilizocheza.

Mabao ya Azam FC katika mchezo huo yalifungwa na kiungo Mudathir Yahya katika dakika ya 11 kabla ya Kipre Tchetche kumaliza kazi katika dakika ya 52.Hata hivyo, Mbeya City walijitutumua na kupata bao katika dakika ya 55 kupitia kiungo wao Raphael Alpha.

Hata hivyo, dakika za mwisho Mbeya City walionekana kukaa vizuri zaidi na kuwahenyesha Azam FC ambao hata hivyo safu yao ya ulinzi ikiongozwa na Serge Wawa ilionekana kusimama imara.

WANA KIMANUMANU WAPATA USHINDI WA KWANZA TANGA

African Sports imeamka baada ya kupata ushindi wake wa kwanza kwenye Ligi Kuu Bara.African Sports imeibuka na ushindi wa bao 1-0 katika mechi ya ligi hiyo dhidi ya Ndanda FC.Katika mechi hiyo kwenye Uwanja wa Mkwakwani mjini Tanga, wageni walionekana kuwa imara zaidi kipindi cha kwanza.

Hata hivyo, wenyeji African Sports walijibu mapigo baada ya kuanza kipindi cha pili kwa kasi hadi walivyopata bao.Bao lao lilifungwa na Hassan Matelema katika dakika ya 59 kupitia Hassan Matelema.

Baada ya bao hilo, Ndanda walicharuka lakini mara kadhaa African Sports ambao walicheza kwa tahadhari kubwa walikuwa wakijibu mapigo.Kabla Sports ilicheza mechi tatu na kupoteza zote, ikianza kufungwa bao 2-0 na Simba, ikasafiri hadi Shinyanga na kufungwa tena kwa idadi hiyo na Mwadui.

Kabla ya mechi ya leo, ilibaki Shinyanga safari hii kwenye Uwanja wa Kambarage, ikachabwa na Stand United bao 2-o.

TFF YATUMA RAMBIRAMBI KWA FAMILIA YA MCHEZAJI WA COASTAL ALIYEFIA UWANJANI MKWAKWANI.

Shirikisho la Soka Tanzania (TFF) limetuma salam za rambirambi kwa mwenyekiti wa klabu ya Coastal Union, Dr Twaha Ahmed kufuatia kifo cha mchezaji Mshauri Salim aliyefariki jana jioni jijini Tanga.

Katika salam hizo za Rais wa TFF Jamal Malinzi kwenda kwa uongozi wa klabu ya Coastal Union, amewapa pole wafiwa ndugu jamaa na marafiki pamoja na uongozi wa klabu hiyo na kusema TFF wako nao pamoja katika kipindi hichi cha maombelezo.

Marehemu Mshauri Salim alikuwa mchezaji wa kikosi cha vijana (U20) cha Coastal Union, alifariki jana jioni wakati akipelekwa hospitali baada ya kuanguka uwanjani wakati wa mchezo wa utangulizi wa timu yake dhidi ya timu ya Eagle Academy ya jiji humo.

Kabla ya umauti kumfika, Mshauri aligongana na mchezaji wa timu ya Eagle Academy na kutolewa nje kwa matibabu, ambapo aliweza kurudi uwanjani na kuendelea na mchezo huo kabla ya kuanguka peke yake tena uwanjani na kufariki akiwa njiani kupelekwa hospitalini.

KIATU CHAKAVU CHA MSHAMBULIAJI WA SIMBA GUMZO MITANDAONI

Kiatu cha mshambuliaji mpya wa Simba, Pape Ndaw raia Senegal kimekuwa gumzo kupita kiasi mitandaoni.Mshambuliaji huyo aliingia katika mechi hiyo kuchukua nafasi ya Hassan Kessy wakati Simba ikiivaa Yanga na kupoteza kwa mabao 2-0.

 

Ndaw ambaye urefu wake ni futi 6.6 na ndiye mchezaji mrefu zaidi katika Ligi Kuu Bara, alionekana akiwa amevaa kiatu aina ya Adidas chenye rangi nyeupe na bluu kikiwa kimechakaa kwelikweli.

Kiatu hicho ‘kilivutwa’ na runinga ya Azam TV na kuzua gumzo kwelikweli.

Uchakavu wa kiatu hicho ambacho ukubwa wake utakuwa zaidi ya namba 12, kilionekana kuchoka utafikiri wachezaji wa ‘mchangani’.

Kuanzia hapo, mashabiki wa Yanga wameanza kuwadhihaki wenzao wa Simba kwamba wamesajili mchezaji ambaye hana hata fedha ya kununua kiatu tu!Wengi walikuwa wakiwatania Simba na kuwaambia ‘wamepigwa’ hawezi kuwa ana mawasiliano au mkataba na Steau Bucharest ya Romania wakati hata kiasi tu hawezi kununua tena katika mechi kubwa kama hiyo.

Baadhi ya mashabiki wa Simba walikuwa wakijibu mapigo kwamba kununua kiatu si kazi ya klabu, badala yake mchezaji mwenyewe.

MANARA ALIA NA MWAMUZI

TAARIFA KWA VYOMBO VYA HABARI

Tarehe 26-9-2015 jana Jumamosi kulifanyika mechi ya Ligi Kuu Tanzania Bara baina ya timu yetu ya Simba Simba dhidi ya timu ya Yanga.

Kwenye mchezo huo timu yetu imepoteza mchezo huo kwa kufungwa bao 2-0.Tumeanza kuandika hivyo hapo juu kwa makusudi kuonyesha sisi Simba tumeyakubali matokeo hayo ya dakika 90 za mchezo na tutumie nafasi hii kiungwana kabisa kuwapongeza watani wetu wa jadi kwa ushindi huo walioupata.Pili tumshukuru Mungu kwa kutuwezesha kumaliza mchezo huo salama, na hapa Mungu ashukuriwe sana pamoja na wapenzi wetu pia.

Sababu washabiki wetu wameonyesha utulivu wa kiunamichezo kwa kutokufanya fujo yoyote licha ya mwamuzi wa mchezo huo Israel Nkongo kuharibu mchezo kwa makusudi.Nkongo kwa dhamira ya kusudi jana aliamua kuwatoa wachezaji wetu mchezoni kwa kuanza kugawa kadi kwa wachezaji wetu pasi na sababu na kwa rafu zilezile kuacha wachezaji wa Yanga kucheza bila kuwaonya.

Kilichoshangaza washabiki wote waliokuwa uwanjani na walioangalia kwenye televisheni ni kumuacha mchezaji wa Yanga Donald Ngoma kuendelea na mchezo ilhali alimpiga kichwa cha maksudi mchezaji wetu Hassan kessy!Mbali ya vitendo hvyo wachezaji wetu wametulalamikia kutukanwa na mwamuzi wa mchezo huo Nkongo.

Tunaamini TFF watachunguza malalamiko yetu na kuchukua hatua stahiki kwa mwamuzi huyo ambaye kila mtu aliyeuona mchezo huo anakiri kuwa alishindwa kuumudu.Mwisho na kwa umuhimu wa kipekee klabu ya Simba inaendelea kuwashukuru washabiki kwa utulivu wao licha ya vitendo vya mwamuzi huyo ambavyo vingeweza kabisa kuharibu amani iliyokuwepo uwanjani jana.

Tunawaomba waendelee kuwa watulivu katika kipindi hiki ambacho uongozi wenu umewaandikia TFF na bodi ya ligi ambazo tunaamini zitatenda haki.

Reclaming our glrory

Simba Nguvu Moja

Imetolewa na Haji S.Manara

Mkuu wa Habari wa Simba

Simba Sports Club

KIPIGO KWA RUVU KOCHA MINZIRO ABWAGA MANYANGA

Kocha wa JKT Ruvu, Fred Felix Minziro, amebwaga manyanga.Minziro anaondoka, mechi yake ya mwisho ikiwa ni dhidi ya Stand United waliolala kwa bao 1-0 lililofungwa na straika nyota wa zamani wa Simba, Elius Maguri.

Minziro ameachia ngazi katika nafasi yake hiyo baada ya kuona mwenendo wa kikosi chake si mzuri katika Ligi Kuu Bara.Kocha huyo ameamua kuachia ngazi saa chache baada ya JKT kupokea kipigo cha bao 1-0 dhid ya Stand United tena JKT wakiwa nyumbani, jana.Katibu Mkuu wa JKT, Ramadhani Madoweka amesema kweli Minziro ameachia ngazi.

“Kweli Minziro ameachia ngazi, timu sasa iko chini ya Greyson Haule,” alisema.

JKT iko njiani kwenda mkoani Tabora ambako ina kibarua kingine kigumu dhidi ya Kagera Sugar ambayo inatumia Uwanja wa Ali Hassan Mwinyi.Hadi Minziro anaondoka alikuwa ameongoza timu hiyo katika mechi nne, akianza ugenini dhidi ya Majimaji mjini Songea ambako walilala kwa bao 1-0.

Baada ya hapo, wakasafiri kwenda Mbeya ambako walichapwa bao 3-0 na Prisons kabla ya kutua jijini Dar es Salaam walipokutana na kipigo cha paka mwizi cha mabao 4-1 dhidi ya Yanga na jana, wakiwa nyumbani kwa mara ya kwanza, wakadundwa 1-0 na Stand.