JAMII YATAKIWA KUWAFICHUA BODABODA WAVUNJIFU WA SHERIA ILI KUTOKOMEZA JANGA LA AJALI.

Jamii imeaswa kuwafichua madereva wa pikipiki wanaovunja sheria za usalama barabarani, wanaoendesha kwa fujo na kusababisha usumbufu kwa watumiaji wa njia ndogo za mitaa na kusababisha ajali na hata vifo huku waathirika wakubwa wakiwa ni watoto, walemavu, wagonjwa na Wazee.

Hayo yamesemwa na Mkufunzi wa chuo cha Mafunzo ya Udereva na Ufundi Stadi(C.U.H) cha jijini Tanga Mwl Mggalu wakati akizungumza na kituo hiki Ofisini kwake kuhusu umuhimu wa mafunzo kwa madereva wa vyombo vya usafirishaji kwa njia ya barabara yaani pikipiki na Magari.

Mwl Mggalu amesema ni wakati sasa jamii kutambua athari za utumiaji holela wa vyombo hivyo kwani watu wengi wamekuwa wakipoteza mali, kupata ulemavu wa kudumu na hata vifo kutokana na ajali zinazosababishwa na madereva wapikipiki ambao ni wazembe na wasiojua sheria za usalama barabarani.

Aidha ameliomba jeshi la Polisi kikosi cha Usalama barabarani nchini kubadili adhabu ya faini na kuwa kifungo kwa madereva wanakamatwa kwa uvunjaji wa sheria za usalama barabarani ili iwe fundisho kwa wengine wanaomudu kulipa faini na hatimaye wanaendelea kuwa chanzo cha ajali nchini.