WAANDISHI WA HABARI WAASWA KUEPUKA USHABIKI WA VYAMA KWENYE UCHAGUZI MKUU WA 2015

Mkuu wa Wilaya ya Korogwe Mkoani Tanga, Hafsa Mtassiwa (kulia) , akizungumza katika semina hiyo katikani ni mwakilishi wa Mkurugenzi mkuu wa Mifuko ya Afya ya Jamii Makao makuu, Eugen Mikongoti, kushoto ni Meneja wa Bima ya Afya Mkoa wa Tanga, Ali Makababu.

WAANDISHI wa habari Nchini wametakiwa kujiepusha kushabikia vyama vya siasa ili kuhakikisha wanaandika habari zenye tija kwa jamii inayowazunguuka.

Rai hiyo ilitolewa na Mkuu wa wilaya ya Korogwe Hafsa Mtasiwa wakati ufunguzi wa semina ya mafunzo kwa waandishi wa habari yaliyotolewa na mfuko wa taifa wa bima ya afya NHIF yaliyofanyika wilayani humo.

Mkuu wa wilaya huyo alisema nafasi ya mwandishi wa habari katika kufikisha habari kwa jamii kwa kutumia kalamu zao ni kubwa hivyo ni vema kutoa habari za ukweli bila ya kumuonea mtu ili amani ya nchi iweze kuendelea.

"Nafasi yenu ni kubwa katika kuhabarisha jamii....lakini kalamu hiyo hiyo ikitumiwa vibaya inaweza kuvuruga amani iliyopo ambayo tumeizoea"alisema Mkuu wa wilaya huyo.

Hata hivyo alitumia fursa hiyo kuwataka waandishi wa habari kuwakumbusha mara kwa mara wananchi umuhimu wa kutunza kadi za kupigia kura ili baadae wakachague viongozi watakao wataka.

"Ndugu zangu waandishi wa kupitia vyombo vyenu vya habari naomba muwakumbushe wananchi kutunza kadi zao ili siku ikifika wapate machaguo sahihi kusiwe na lawama"alisema Hafsa.

Kwa Upande wake Mkurugenzi wa mfuko wa afya CHF Eugen  Mikongoti alisema lengo ni kuhakikisha wanahabari wanakuwa na utaratibu wa kupata matibabu ili kuepuka mazingira hatarishi.

"Kwa kuelekea kwenye uchaguzi mkuu ni bora kila mwandishi apate kadi ya bima ya afya ili kwani uwezi kujua pirika pirika zitakuwaje kulingana na wakati"alisema Mkurugenzi Mkongoti.