AFRICAN SPORT WANA KIMANUMANU WAFANIKISHA UCHAGUZI KWA AMANI. BOSNIA APETA.

Na Mariam Cyprian,Tanga

Klabu ya African Sport wana kimanumanu wamefanikiwa kufanya uchaguzi na kupata viongozi watakaoiongoza klabu hiyo kwa kipindi kingine cha miaka minne ambapo wanaanza ukurasa mpya wa wakishiriki mashindano ya ligi kuu ya soka Tanzania Bara msimu mpya wa 2015/16.

Akisoma matokeo ya uchaguzi huo mwenyekiti wa Kamati ya Uchaguzi ya TFF Bw Aloyce Komba,alisema klabu hiyo ilikuwa na wanachama 76 ambapo wanachama 52 ndio waliopiga kura katika uchaguzi huo.Aidha alimtaja Hassan Shehe kuwa ndie aliyeibuka kuwa mwenyekiti wa klabu hiyo akipita kwa kura zote  zilizopigwa ambapo katika nafasi hiyo hakuwa na mpinzani.

Alimtaja Abdull Ahmed(Bosnia) kuwa ndie makamu mwenyekiti ambaye pia alipata kura zote zilizopigwa huku akiwa hana mpinzani katika nafasi hiyo.

Mwenyekiti wa Kamati ya Uchaguzi ya TFF

Bw Aloyce Komba

Nafasi za wajumbe zilikuwa tano ambapo wajumbe watatu walipatikana huku nafasi nyingine mbili zikiachwa wazi baada ya Wajumbe wawili ambao ni  Ally Ramadhani na Mohammed Omari kuondolewa kwenye uchaguzi kutokana na sababu za kutokidhi vigezo vya kugombea.

Walioshinda ni Mwinshame Mbwana aliyepata kura 52, Godios Kimath aliyepata kura 51 na Abdallah Ahmed aliyejizolea kura 51 kati ya bkura zote zilizopigwa.

Akizungumza baada ya uchaguzi huo Mkurugenzi Msaidizi wa Sheria na Uanachama kutoka TFF Bw Eliud Mvella aliipongeza kamati ya uchaguzi ya African Sport kwa kuwa na maandalizi mazuri yaliyofanikisha uchaguzi huo kufanyika kwa utulivu na amani sambamba na tabia nzuri ya wanachama wa klabu hiyo kwa kuwa na maelewano baina yao.

Alisema hakukuwa na usiri katika mchakato mzima wa wa uchaguzi huo kama inavyoelezwa na baadhi ya watu kwani matangazo kuhusu uchaguzi huo yalitolewa mapema na kwa uwazi.

Naye mwenyekiti Hassan Shehe aliyechaguliwa ambaye pia ndiye aliyekuwa akiiongoza klubu hiyo alisema atahakikisha anaiendesha vizuri klubu na kuwachukulia hatua wale wote ambao watajaribu kuleta migogoro katika klubu hiyo.

Kwa upande wake mjumbe wa kamati aliyechaguliwa kwenye uchaguzi huo Bw Godias Kimath alishukuru wanachama wa klabu hiyo kwa kuwaamini na kuwapa nafasi hiyo na kuahidi makubwa kwa wanachama ikiwemo kurudisha heshima ya afrikan sports ikiwemo na kuchukua ubingwa wa Tanzania bara.